طفولة كارثية

تمت الإجابة عليها

اسم السائل :

أم . أ

رقم الاستشارة :

1

انا تعبانه اوي انا الحمد لله عدي عليا كل انواع الابتلاءات اللي في الدنيا … اخين مدمنين دمروا حياتي … اب مات

بحسرته من ولاده وانا طفله عندها ١٢ سنة … ام عرفت رجاله بعد جوزها و فضحتنا في كل حته و سيرتنا بقت

علي كل لسان كنت بتشتم يوميا بأقذر ألفاظ و انا طفله و كنت بنت خجوله جدااا و حساسه كنت كل ما افتح بؤي

واقول اي كلمه كانو يتريقوا عليا و يهينوني لحد مابقيت اكره الكلام و مابعرفش اعبر عن نفسي لحد

دلوقتي كنت بتضرب في وسط الشارع من اخويا و انا عيله ماكملتش ٨ سنين ،الام كانت بخيله اوي كانت

بتمشيني بهدوم مقطعه و تسمح لقرايبها يشفقوا عليا و يدوني لبس من عندهم ،كنت بنزل دروس ثانوي بلبس صيفي في عز الشتا و البنات

يقولولي انتي ازاي مش بردانه اقولهم عادي انا ماببردش و الحقيقة اني بكون متلجه لكن معنديش هدوم شتوي ألبسها

الام كانت لما حد من عيالها يغلط حتي لو غلطه بسيطه جدا كانت تدعي عليه بطريقه بشعه

( ياكش تاكلك عربيه – ياكش ماتوعي ترجع غير مقطع )

الام كانت بتتعمد تجرح ولادها و تصغرهم قدام الناس و تطلعهم اوحش ناس في الدنيا ،اخويا كان بيشرب حاجه

تخليه يتشنج و يغم عليه و يطلع رغاوي من بؤه و اول ما يفوق يتجنن و يفضل يضرب فينا و يخنق فينا لدرجة

مرة كنت هموت في أيده و طبعا فضايح و ناس بتتلم عشان يحوشونا من أيدها

خويا التاني كان يوميا يرجع مش قادر ينطق من كتر الشرب و ييجي يفضل يرازي فينا و يسرقنا و كنت بنزل في

انصاص الليالي ادور علي اي حد في الشارع ينجدنا منه وديناه مصحه اكتر من مره كان بيهرب و ييجوا يكتفوه و يربطوه

من أيده و رجله و يشيلوه في عصايه قدام الناس و المشهد دا لوحدو كفايه ،كان بيضرب امي ضرب مبرح و كنت أبقي قاعده

كذلك شايفه و مش قادره انطق ولا افتح بؤي و هموت من الخوف و القهره و المشهد دا بردو لوحده كفايه اوي اوي اوي

أنا اللي بقوله دا اقسم بالله ولا حاجه جمب اللي كان بيحصل حقيقي ولا يوفي حق ليلة واحدة عيشتها وسطهم ،و كملت

دلوقتي بزوج عصبي حاد مايعرفش يعني ايه اني عندي اكتئاب مزمن و عايشه بيه من زمان فاكر اني بقصر

في بيتي و مع ولادي عشان بتدلع مش عشان انا مريضه اكتئاب و دايما يقطمني و يقولي كلام زي السم

علاوة على تقليل و اهانه حتي قدام أهله

انا تعبت و الله اوي تعبت من كل حاجه تعبت بجد و مش عارفه اعمل ايه .


الرد على الاستشارة :

إنتي كدا عندك حاله تسمي باضطراب ما بعد الصدمه ومعاها اكتئاب والحالة بتاعتك محتاجه تدخل دوائي وجلسات علاج نفسي بطريقه

أو بأخري سنتقبل الماضي ونتصالح معو ، وجوزك لما يجي معاكي الجلسات ويفهم شعورك بجد يمكن يستوعب شويه قصتك وحياتك لسه مخلصتش

أيضا عندك اولاد حلوين اكيد بيحبوكي هتحتاجي تقرأي كتب كتير تفيدك وتثقفك تقدري تبدأي حياه جديده

من ناحية أخرى لو انتي راكبه عربيه وانتي

بتسوقي لو بصيتي للخلف العربيه هتتقلب يبقي النظر والاحساس الكتير بالماضي هيضيع منك الحاضر

في النهاية لازم تتعلمي تقدري نفسك ف ال معاكي هيقدروكي ، لو انتي بتتعاملي مع نفسك بتقليل اللقدامك

هيتعامل بنفس الطريقة ، تاني حاجه انتي مش اكتئاب مزمن .